Mi vojaĝis sola ĉimatene al Silver Bay por la Aŭtuna Renkontiĝo. Survoje, la komenco estis malseka, sed la pluvo ĉesis ĉe Albanio kaj mi alvenis bonorde sufiĉe frue por tagmanĝi ĉe Silver Bay.
Ĉijare, Normando volis eltiri sin el la organizado — aŭ almenaŭ ne estu la ĉeforganizanto. Tomaso traktis la kontrakton kun Silver Bay, Julie organizis la junularan domon, kaj mi prizorgis la programon. Sed ni konvinkis lin oferti la bonvenigajn rimarkojn ĉe la komenco.
Multaj homoj parolis pri la pasinta jaro en Esperantujo: vizitoj al la UK, NASK, kaj diversaj aliaj Esperanto-aranĝoj tra la mondo. Ŝajnis ke neniu partoprenis la usonan landan kongreson. Mi menciis mian viziton al la Esperanto Klubo de Orient-Centra Ilinojo kaj transdonis ties salutojn.
La nombro de partoprenantoj, kiu antaŭ jaroj kutimis atingi 50, nun svebas proksimume je 40. Lunde, ni diskutos la venontan jaron kaj unu temo devos esti kiel allogi pli da homoj, ĉar de la nombro falas sub 40, la prezoj kaj aranĝoj fariĝas malpli favoraj.
Morgaŭ estas plena tago kiu komeniĝos per mia programero "Ni Verku Hajkojn". Mi simple invitas homojn sidi kun mi dum horo por verki hajkojn: Tute simpla plezuro.
- Steven D. Brewer's blog
- Log in to post comments